|| रितेपण ||

💝तिच्यातील ती💝
=============
|| रितेपण ||
========
म्हणाली ती,
तुझ्याशिवाय जीवन अधुरे
जशी न भरणारी रिक्त पोकळी..
तुझ्या जवळ असण्याने रे
उमलते माझ्या मनाची कळी..!!

उत्तरलो मी,
रितेपण, अधुरेपण म्हणतात जे
ते नेमके सांगशील काय असते..?
माझ्या केवळ असण्याने
नेमके कसे भरून निघते..??
म्हणाली ती,
असा का रे निष्ठुर वदतो
प्रेमावर जणू शंका घेतो..
कळणार नाही तुला कधीच
माझ्या अवती भोवती तूच असतो..!!
उत्तरलो मी,
शंका नाही मुळीच सखे
मात्र सत्याचे अवलोकन करतो..
रितेपण तू म्हणतेस ज्यास
तो एकांताचा आकांत असतो..!!
म्हणाली ती,
असेलही कदाचित ठाऊक नाही
पण घर खायाला उठते..
असंख्य विचारांच्या वादळात
आठवण अलगद येऊन खेटते..!!
उत्तरलो मी,
अगं घरोघरी मातीच्याच चुली
प्रत्येकाची वेगळी बोली..
गुंतवून घे तू स्वतःस कशात
अन बदलून टाक देहबोली..!!
*****सुनिल पवार....✍🏽😊