|| कविता माझी ||

💝तिच्यातील ती💝
============
|| कविता माझी ||
============
म्हणाली
ती
आज कविता तुझी,
होऊन जाऊ दे..
कशी सजते धजते,
मला पाहू दे..
म्हणालो
मी
थांब जरा तू,
रंगी न्हाऊ दे..
कवितेस अधिक,
समीप येऊ दे..!!

म्हणाली
ती
असते ना ती,
नेहमीच जवळ..
माझ्या पेक्षा ती,
अधिक प्रेमळ..
म्हणालो
मी
तशी असते ती,
नेहमीच जवळ
पण प्रतिरूप ती,
तुझीच केवळ..!!
म्हणाली
ती
चढवू नको तू,
उगाच हरभऱ्यावर..
तुझ्या मनात त्या,
सवतीचाच वावर..
म्हणालो
मी
नाईलाज आहे ग,
तू मोती तर ती सर..
धरून येते ना ती,
तुझाच पदर..!!
म्हणाली
ती
भासवतोस तसा,
पण नाही कदर..
प्रत्येक पुरुषाचं हे,
नेहमीचंच सदर..
म्हणालो
मी
तुझ्या नजरेचा हा,
दोष खरोखर..
पाहू नकोस तू ,
केवळ वरवर..!!
म्हणाली
ती
तू म्हणतोस म्हणून,
आता मी मानते..
सांग तुझी सखी,
कविता काय म्हणते..
म्हणालो
मी
तुझ्याच मनाचं,
गुपित ती खोलते..
कविता ही माझी,
पण
बोली तुझी बोलते..!!
***सुनिल पवार...✍🏽😊