|| मृत्युंजय ||

|| मृत्युंजय ||
=========
कळत नव्हते मला
नेमके भाव माझे कोणते होते..
अप्रूप का असूया..??
कृष्णा तुला मात्र कळले होते..
तुझ्या सर्वज्ञ असण्यानेच
माझ्या मनास छळले होते..!!

निःसंशय तुझे स्थान वरचेच होते
हे मी जाणिले तेव्हाच
जेव्हा,
निर्वाणीच्या क्षणी
तू मातेस मजकडे धाडले होते..
शेवटी तू ही आलास..
अन प्रथमच,
मी कोणा याचकास रिते धाडले होते..!!
तसा कळला नाहीस रे तू कधीच मला
मी केवळ कयास लावत होतो
दिल्या वचनाला जागायचं होतं..
पण
मन तुझ्याकडे धावत होतं..!!
तुला अव्हेरून
मी मारणास माझ्या निवडले होते
तसेही ते अटळच होते
अन तुलाही ते ठाऊक होते..
पण एक मात्र जाणले मी
माझे मन वळवताना कृष्णा
तुझे नेत्र भावूक होते..!!
आणि तसंही
मी कुठवर घेऊन जाणार होतो
माझे हे शापित जीवन
माझ्या जीवनाचे दोर
मी स्वतःहुन जे छाटले होते..
कवच कुंडले अभेद्य
केव्हाच इंद्राने लाटले होते..!!
द्यूत पांडव खेळले होते
पण सर्वस्व हरणारा केवळ मीच होतो..
अन तुलाही हे मान्य करावेच लागेल
कृष्णा..
सर्वस्व हरूनही मृत्यूस जिंकणारा
केवळ मी
आणि मीच होतो..!!
***सुनिल पवार....✍🏽