💝तिच्यातील ती💝=============
|| भौतिक || नैतिक ||
==============
मी सहज
तिला जवळ ओढलं
अन
ती हसून म्हणाली,
अलीकडे पाहतेय मी
दिवसेंदिवस वाढत चाललाय
तुझा कल भौतिकतेकडे..
लक्षण हे बरे नव्हे
जरा वळशील का रे तिथून
कधीतरी नैतिकतेकडे..!!
मी हसलो मिश्किल
म्हणालो
भौतिक, नैतिक
हे केवळ
दोन शब्दांचे बुडबुडे..
आणि सांग ना
नैतिकतेला असते का ग
कधी
भौतिकतेचे वावडे..??
तू उगाचच देतेस
प्रत्येक वेळी
नैतिकतेचे धडे..!!
ती तितकीच ठाम
पुन्हा म्हणाली
तू कितीही बदललेस जरी
शब्दांनी अर्थाचे रुपडे..
इतके मात्र खरे
संयमाच्या कसोटीवर
तुझे शब्द पडतील तोकडे..
सोड ना जाऊदे
तसाही तू
सुधारणार तर नाहीस
ते म्हणतात ना
-- -- चे शेपूट
कितीही वर्ष ठेवा नळीत
वाकडे ते वाकडे..!!
मी ही उत्तरलो
तसाच ठाम
म्हटलं
नैतिकता,भौतिकता
ही तर केवळ
मनाची मानसिकता
असते जिथे एकरूपता
तिथे पडतील कसे सांग
नात्याला तडे..?
असेच असते ग हे प्रेम वेडे
म्हटलं तर सहज सुलभ
अन म्हटलं तर
न उलघडणारे कोडे..!!
****सुनिल पवार....
✍🏽
