***मनाच्या गाभाऱ्यात***

***मनाच्या गाभाऱ्यात***
=================
मनाच्या गाभाऱ्यात
मनाचे संग..
मनाच्या संगतीला
आठवणीचे रंग..!!

आठवणीच्या रंगावर
भावनेची चौकट..
भावनेच्या चौकटीत
मन माझे दंग..!!
*****सुनिल पवार....

|| माझ्या कोकणाची भूमी ||

अष्टाक्षरी
|| माझ्या कोकणाची भूमी ||
===============
माझ्या कोकणाची भूमी
दिसे सुंदर देखणी..
शालू हिरवा लेवुनी
नटे उल्हासे श्रावणी..!!

ओली वाट वळणाची
शुभ्र झऱ्यांचीच गाणी
धाव घेती नदीकडे
जसे भेटण्या साजणी..!!

भातरोपे चहुकडे
गालिच्याची अंथरणी..
वेेेल झूले बांधावर 
साजे काशिद्याची लेणी..!!

रानफुले बहरली
फेड़ी डोळ्यांची पारणी..
वारा घोंगावे कानात
सांगे पाखरांची वाणी..!!

किती वर्णावी महती
एक अनोखी पर्वणी
दिसे लाखात उठून
माझी कोकणाची राणी..!!
******सुनिल पवार.....

।। सुर सुन्या मैफिलिचे ।।

सूर सुन्या मैफिलीचे..

तुझ्या असण्याने असतात गं

भाव गहिरे मोहाचे।

तुझ्या नसण्याने वाहतात गं

अश्रु वेदनेच्या डोहाचे।

तुझ्या असण्याने रंगतात गं

खेळ चंद्र तारकांचे।

तुझ्या नसण्याने जमतात गं

ढग काळे आशंकांचे।

तुझ्या असण्याने फुलतात गं

फुलोरे मनाच्या सृष्टीचे।

तुझ्या नसण्याने सलतात गं

काटे नसत्या गोष्टीचे।

तुझ्या असण्याने नादतात गं

स्पंदने लयीत हृदयीचे।

तुझ्या नसण्याने भासतात गं

सुर सुन्या मैफिलीचे।

--सुनील पवार..

|| कांदा ||

|| कांदा ||
********
रडवतोय कांदा,आता खाणे कसले
महागाईंच्या नावाने,मी डोळे पुसले..!!

नाकाने सोलने,दुरापास्त झाले
नावानेच डोळ्यात,पाणी आले..!!

उच्चांक नवा, गाठतोय कांदा
अडत्या करतोय,नफ्याचा धंदा..!!

गरीबाचा घास,हिरावतोय कांदा
आणायचा कुठून, रूपया बंदा..!!

कांदयावीना आता झालोय मिंधा
बेस्वाद जेवण,अन जिभेचा वांदा..!!
*******सुनिल पवार.....

|| पाळणाघर ||

|| पाळणाघर ||
=========
[बोल बाळबोध]
=========
काल होते हातावर
आज आहे काट्यावर
मम्मी पपा कामावर
झुलवतोय मला पाळणाघर..!!

कुटुंबाच्या त्रिकोणात
संक्रात आजी आजोबावर
संस्काराची धुरा सारी
आली आया मावशावर..
मम्मी पप्पा कामावर
झुलवतोय मला पाळणाघर..!!

गोड अक्षरांची आई
आली कधीच मॉमवर
बाबांचाही डॅड झाला
असतात नेहमी टूरवर
मम्मी पप्पा कामावर
झुलवतोय मला पाळणाघर..!!

रांगत होते बाळ गोजिरे
चिऊ काऊच्या घासावर
काळ बदलला आले सारे
शिस्तीच्या धोशावर..
मम्मी पप्पा कामावर
झुलवतोय मला पाळणाघर..!!

वेळ नाही घेण्या कडेवर
कसरत ही नित्य तारेवर
अवलंबून सारेच गरजेवर
कळतय जरी नाही बरोबर..
मम्मी पप्पा कामावर
झुलवतोय मला पाळणाघर..!!
******सुनिल पवार.....

II बात बन जाये II

II बात बन जाये II
===========
बदलते है इंसान यहा,
बदलते ही हालात..
जुदाई होती लंबी,
और छोटी मुलाक़ात..!!

मिलते है इंसान मगर,
ना मिलते खयालात..
मिल जाए दोन्हो अगर,
तो बन जाये बात..!!
*******सुनिल पवार.....

|| नारळी पोर्णिमेचा सण आला ||

|| नारळी पोर्णिमेचा सण आला ||
===================
नारळी पोर्णिमेचा सण आला
घेवून रक्षा बंधनाला..

औक्षण करुया सागराचे
देईल रत्न तो सुखाचे..
औक्षण करुया भावाचे
देईल वचन तो रक्षणाचे..!!
अर्पुया नारळ सागराला
बांधुया राखी भावाला..
नारळी पोर्णिमेचा सण आला
घेवून रक्षा बंधनाला..!!

नाते अनोख्या प्रेमाचे
नाते हे बहिण भावाचे..
नाते अनोखे कृतज्ञतेचे
नाते हे कोळी सागराचे..!!
अर्थ देवुया धाग्याला
जागुया दिल्या वचनाला..
नारळी पोर्णिमेचा सण आला
घेवून रक्षा बंधनाला..!!
******सुनिल पवार....

II धुमशान II

II धुमशान II
========
कोण वाहतोय भूषण
कोण देतोय दूषण..
घरात नाही रेशन
ठोकत सुटतोय भाषण..!!

कोणाच उदघोषण
तर कोणाच प्रोमोशन..
कोणाच्या जिवावर
कोण होतंय रोशन..!!

उपासमार, कुपोषण
कुठे अबलांचे शोषण..
चाड आहे कोणास
कुठे आहे शासन...!!

सारेच कसे पाषाण
व्यवस्था भासे स्मशान
सामान्य सरणावर
अन नेत्यांच धुमशान..!!
**********सुनील पवार....

II नागपंचमी II

|| नागपंचमीच्या हार्दिक शुभेच्छा ||
=====================
निसर्गाच्या बांधीलकीतून
निर्मित झाला नागपंचमी सण।
त्या निमित्ताने का होईना
माणूस उतरवू पाहतोय नागाचे ऋण।

शेतकऱ्यांचा सच्चा मित्र
तो उंदीर खाऊन पीक वाचवतो।
पण माणूस मात्र जागोजागी
त्यांचा संहार करताना दिसतो।

भीतीपोटी दंश करतो कधीतरी
तो सहसा कुणाच्या वाटेस जात नाही।
अन् तुमच्या समजुतीप्रमाणे
तो दूध अन् लाह्या सुद्धा खात नाही।

निसर्ग साखळीचा अविभाज्य भाग
म्हणून त्याच्या अस्तित्वाला जपायला हवे।
केवळ आंधळी पूजा उपयोगी नाही
तर सणाचे मर्म समजून घ्यायला हवे।

जिवंत नागाचा अट्टाहास मुळीच नको
त्याचे प्रतिकात्मक पूजन जरूर  करा।
विज्ञानाच्या चष्म्यातून पहा अन्
समृद्ध सणाचा आनंद द्विगुणित करा।
--सुनिल पवार..✍️

||| ध्यास घरट्याचा ||

||| ध्यास घरट्याचा ||

============

काडी काडी केली गोळा

तरी लागे नेत्री झळा..
एक ध्यास घरट्याचा
झाला पाला रे पाचोळा..!!

 

होता झूलत नभात
उंच स्वप्नांचा झोपाळा..
आला कुठूनसा वारा
मना उडवून गेला..!!

 

भेटण्यास सागराला
आले उधाण मनाला..
मार्ग खाच खळग्यांचा
नाही तमा सरितेला..!!

 

ओढ होती का रामाला
धाडे वनात सीतेला..
जग अग्निकुंड सारे
अंत नसे त्या शिक्षेला..!!

 

काय म्हणू नियतीला
कसा घातला रे घाला..
स्वप्न ईमला गोजीरा
तिने मातीमोल केला..!!

क्रमशः 

--सुनिल पवार..✍️

|| मयुरा ||

|| मयुरा ||
======
होता आगमन श्रावणाचे
इंद्रधनुसे फुले मनात..
ऊन पाऊस खेळ चाले
आठवणीच्या वनात..!!

ओढ़ लावीते जीवास
हळव्या प्रीतीची हिरवळ..
मोहक तव चालणे जैसे
हिरव्या पानांची सळसळ..!!
धुंद वाऱ्याच्या लहरीवर
होई बावरे मन चंचल..
फुला फुलावर मुक्त डोले
तुझेच सुंदर मुखकमल..!!
सरीवर सर धावून येते
उडवीत रिमझिम फवारा..
लोभस तव हास्य जैसे
खळखळ ओढ्याचा नजारा..!!
गंधाळत अन मनास भारत
शीळ घालीत येतो वारा..
नाचे थुई थुई श्रावणात
आठवणींचा मोहक मयूरा..!!
******सुनिल पवार...✍🏼

|| श्रेष्टतेचा हव्यास ||

|| श्रेष्टतेचा हव्यास ||
=============
समजलो पुण्यवान स्वतःस
जन्मताच सुयेर झाला..
मरणानेही ना सुटला
सुतकाने बाध्य झाला..!!

कळेना मज काहीच
कुठे राहिले ते पूण्य
माणसाच्या जीवनात उरतो
अंततः केवळ शून्य..!!

तरीही पाळतोय मी
माणासाचेच रीती रिवाज
जसा व्यर्थच पाळतोय मी
अहम् श्रेष्टतेचा हव्यास..!!
🙏🌹🙏🌹🙏
****सुनिल पवार...

।। जिंदगी ।।

जिंदगी..

काहे गुमान करे तू
ऐ जिंदगी..
चंद सासोंकी मेहमान तू
है जिंदगी..
ना कुछ तेरे बस में है
ऐ जिंदगी..!!
है मिट्ठी का इक ढेर तू
ऐ जिंदगी..!!

इतना भी ना उछल तू
ऐ जिन्दगी..!!
के जमीं के लिए तरसे तू
ऐ जिंदगी..!!
कर गुनाहोसे तौबा तू
ऐ जिंदगी..!!
कर खुदा की बंदगी तू
ऐ जिंदगी..!!
--सुनिल पवार..

|| शब्द शब्द ||

|| शब्द शब्द ||
==========
शब्दांच्या चढाओढीत
हार जीत शब्दाची होते..
क्षणिक शाब्दिक वादात
मन कायम दुखावले जाते..!!

वाटते कधी मनास
शब्द माझेच खरे होते..
तरीही मग का उगाच
मन हळवे हुरहुरते नुसते..!!

शब्द शब्द कधी एकाकी
अविचित मनात रुततात..
शब्द शब्द परी अंती
मन मनास पूज्य असतात..!!
****सुनिल पवार...

|| नारीच्या नशीबी ||

|| नारीच्या नशीबी ||
=============
न मागताच मिळाले सारे
मुखवट्यातले बेगड़ी चहरे..
छद्मी हास्य अन लोचट शेरे
नारीच्या नाशिबी हे,
भोग असे का रे..!!

तुला प्यारे तुझे, सगे सोयरे
तयांस कधी तू छेडले का रे..
मीही कुणाची भगिनी ना रे
तुला ती वेगळी दिसते का रे..??

राम बनून जो घरात वावरे
बाहेर रावण बनतो का रे..
माय भगिनीचे प्रेम सारे
पड़ता बाहेर विसरतो का रे..!!

चंचल मनाचे तुझ्या चंचल वारे
अंतरात्म्यास टटोल जरा रे..
संकुचित मनाची उघडा दारे
नजरेत तुमच्या सन्मान भरा रे..!!
*********सुनिल पवार......

।। स्वातंत्र दिनाच्या हार्दिक शुभेच्छा ।।

।। स्वातंत्र  दिनाच्या हार्दिक शुभेच्छा ।।
========================
������������������������������������
========================
धमण्यांतुन वाहे
जाज्वल देशाचा अभिमान
नजरेत भरून राहे
माझ्या तिरंग्याची शान..!!

जन्मभूमी तू कर्मभूमी
तूच माझा जीव प्राण
हृदयात चिरंतर आहे
माझा भारत देश महान..!!
================
������������������������
================
******सुनिल पवार....

|| पाहायचा आहे मज ||

||पाहायचा आहे मज||

पाहायचा आहे मज भारत

माणसात माणुसकी असलेला..

जातीधर्माच्या बंधनातून सुटलेला

एका प्रवाहात मिसळलेला..!!

पाहायचा आहे मज भारत

गरीब श्रीमंतीची दरी नसलेला..

सर्वसमान हक्क असलेला

साखरेसम पाण्यात विरघळलेला..!!

पाहायचा आहे मज भारत

शिक्षणाचा बाजार नसलेला..

गुरु शिष्य नाते जपलेला..

आदर्श गुरुकुल साकारलेला..!!

पहायचा आहे मज भारत

लोकप्रतिनिधी सच्चा असलेला..

सामाजिक भान जपलेला..

खऱ्या अर्थाने लोकशाही रुजलेला..!!

पहायचा आहे मज भारत

स्वच्छ आणि सुंदर नटलेला..

शिस्तप्रिय सुदृढ असलेला

सुवर्णयुग पुन्हा अवतरलेला..!!

पहायचा आहे मज भारत

जो नव्याने स्वतंत्र झालेला..

स्वावलंबी संपन्न झालेला

सार्वभौम शक्तिशाली बनलेला

""""""""""""आणि""""""""""

अभिमानाने जगात मिरवलेला..!!

--सुनिल पवार..

10भारत जगताप, Pratiksha Kurhade and 8 others

6 Comments

Like

Comment

Share

II शिकतोय कविता II

II शिकतोय कविता II
=============
कोणी शब्द मला गुंफुन दाखवा
हो शिकतोय कविता शिकवून दाखवा..!!

मुक्त छंदाचे नियम सारे
मला बी तुम्ही शिकवा ना रे
कसा सजवायचा फुलांचा ताटवा
हो शिकतोय कविता शिकवून दाखवा..!!

यमकाचे गणित समजेना काही
मात्रा अलंकाराच् नाव नको बाई
कोणी चारोळीला कडव्यात बसवा
हो शिकतोय कविता शिकवून दाखवा..!!

विषयाचा विषय समजवा कोणी
शंका एक आलीय माझ्या मनी
कोणी विषयात विषय ज़रा घुसवा
हो शिकतोय कविता शिकवून दाखवा..!!

भावनेस जागा असते का काही
उधळावी कशी अलंकारी लाही
पडलाय अंधार दिवा ज़रा पेटवा
हो शिकतोय कविता शिकवून दाखवा..!!

कोणी शब्द मला गुंफुन दाखवा
हो शिकतोय कविता शिकवून दाखवा..!!
*******सुनिल पवार......

|| झेंडा ऊंचा रहे हमारा ||

|| झेंडा ऊंचा रहे हमारा ||
===============
स्वातंत्र दिन जवळ आला
आता देश प्रेमाचा वाहील वारा..
वर्षभराचा सुस्त पसारा
जागृत अकस्मात् होईल सारा..!!

झेंडा ऊंचा रहे हमारा
आसमंती घुमेल नारा..
तासाभराचा समारोह सारा
जाईल मग जो तो घरा..!!

असाच होतो हो आमचा
नित्य स्वतंत्र दिन साजरा..
घरात बसून आम्ही म्हणतो
झेंडा ऊंचा रहे हमारा..!!
****सुनिल पवार...

II जलद आले II

जलद आले..

जलद आले जलद आले..

काय असे भरुनी आले..!!

वारे शीतल वाहू लागले..

का डोळ्यातून पाणी आले..!!

सृष्टि नवा साज ल्याली..

का तू अशी हिरमुसलेली..!!

पाने फुले हर्षे भिजलेली..

का तू दिसते थिजलेली...!!

खळखळ वाहे ओहळ पाणी..

का गंं मलूल तुझी साजणी..!!

वारा गातो पाऊस गाणी..

का मूक झाली तुझी वाणी..!!

पालवी कोवळी फुटू लागली..

का तू रुक्ष कोमजलेली..!!

विसर सखे कटु आठवणी..

छेड़ प्रिये तू प्रीत दिवानी..!!

--सुनील पवार..

II मन मनाच्या II

II मन मनाच्या II
*****************
मन मनाच्या सागराला
मनाचा किनारा..
मन मनाच्या किनाऱ्याला
क्षितीज पसारा..!!

मन मनाच्या क्षितिजाला
मनाचा नजारा..
मन मनाच्या नजाऱ्याला
मनोरंगाचा सहारा..!!

मन मनाच्या रंगात त्या
मनाचा मयूरा..
मन मनाच्या मयूराला
मानाचा पिसारा..!!

मन मनाच्या पिसाऱ्याला
नजरेचा भुलोरा..
नजरेच्या भुलोऱ्याला
मन वाऱ्याचा फुलोरा..!!

मन वाऱ्याच्या फुलोऱ्याने
उठे मनात शहारा
मन मनाच्या शहाऱ्याला
असे आठवांचा उबारा..!!
******सुनिल पवार....

II मी माझ्यातला II

II मी माझ्यातला II
*******************
मी माझ्यातला
ना पाहिला
मी तुझ्यातला
का पाहिला..??

मी माझ्यातला
नाकारला
मी तुझ्यातला
दाखविला..!!

मी माझ्यातला
बदलला
मी तुझ्यातला
ना दिसला..!!

दोष तोच होता
नजरेतला
मी पणा त्यात
लपलेला..!!
***सुनील पवार...

|| भातुकली ||

|| भातुकली ||
=========
खेळ तो भातुकलीचा
राजस राजा राणीचा..
खेळ तोच स्वप्नातला
तुझ्या माझ्या मनातला..!!

तुलाही आवडलेला
मलाही आवडलेला..
डाव एक मांडलेला
भावनांनी सांधलेला..!!

दृष्ट जशी लागलेला
ना कोणा समजलेला..
मी मनात जपलेला
अर्ध्यातच मोडलेला..!!
****सुनिल पवार.....

II हायकू II

II हायकू II
=======
शिकतोय मी
हायकुचा प्रकार
घेतो आकार..!!

शिकुया सारे
ते काव्याचे प्रकार
ते अलंकार..!!

शब्द साकार
लहान अविष्कार
काव्य प्रकार..!!

काव्य ते जाण
दिसे जरी लहान
अर्थ महान..!!
****सुनिल पवार....

||| बेजबाबदार |||

||| बेजबाबदार |||
==========
बेजबाबदारपणाचा कळस
आजची प्रसार माध्यमं
महत्व कोणास द्यावे
ना राहिले तारतम्य..!!

देशप्रेमींसाठी असते
एक छोटसं विधान..
देशद्रोह्यांसाठी मात्र
दिवसभराच घुमान..!!

एकीकडे राजकीय चिखल
दूसरी मिडियाची दलदल..
कोणास ना कसली चाड
उद्धिष्ट मात्र ह्यांच सफल..!!

प्रश्न कोणास करावे..??
कोणास किती महत्व द्यावे..??
आग लावून समाजात
ह्यांनी नामानिराळे राहावे..!!

टी आर पी च्या स्वार्थात्
ब्रीद पत्रकारीतेचं विसरले..
सार्वभौमत्वास काळीमें फासले
वर आम्हीच पाहिले..
शेखी मिरवते झाले..!!
*******सुनिल पवार...

।। मैत्री आमची लईभारी ।।

नमस्कार मित्रहो,
लोक म्हणतात फेसबुक म्हणजे एक आभासी जग..पण हे जग आम्ही मैत्रीच्या रुपात वास्तवात उतरवलं..तितक्याच प्रेमाने जोपासलं..तेच भाव माझ्या काव्यात उतरले...मैत्रीदिनी शब्द फूल वाहीले..
================
।। मैत्री आमची लईभारी ।।
=================
आभासी जग हे जरी
मैत्री तरी ही लईभारी..
नकळत जुळले ऋणानुबंध
दृढ़ झाली त्यातून यारी..!!

होते अनाहूत मिळाले सल्ले
रहा मित्रा जरा सतर्क..
नको खेळ विस्तवाचा
आणि असेच तर्क वितर्क..!!

खोडून काढले तयांचे
सारेच तर्क वितर्क..
कोळून प्यालो मी
त्याचेच करून अर्क..!!

आभासी जग मग सारे
उतरले असे प्रत्यक्षात..
घडली भेट अन समजले
हिरेच गवसले साक्षात..!!

नकळत बसले मनमंदिरी
जाणे येणे झाले घरी..
निर्मोही स्नेह जुळले
मैत्री अशी ही लईभारी..!!

जपले मनात सर्वानीच
मैत्रीचे हे सोनेरी पर्व..
आमच्या ह्या मैत्रीचा
मला असेल नित्य गर्व..!!
*****सुनिल पवार......

|| मी स्वच्छंद ||

|| मी स्वच्छंद ||
==========
पटलं राहावे
नाही तर जावे
कशास ते हवे
वाद फूंका..!!

नको ते नियम
नाही जे कायम
नकोच तो यम
एडमिन..!!

होतात हो चुका
माणसाच्या लेका
कशा मग हेका
धरावा तो..!!

नको मज बंध
मन हे स्वच्छंद
मिळे जो आनंद
घेत जातो..!!
****सुनिल पवार...

|| निसर्ग ज्ञानझरा ||

निसर्ग ज्ञानझरा..

जेथे जातो तेथे गुरु मज दिसतो।
निसर्ग बनते शाळा मी विद्यार्थी होतो।

गाय हंबरे वात्सल्ये वासरु घेतसे धाव।
ममतेच्या सूत्राचा तेथे लागे ठाव।

किलबिलती पाखरे शीळ घाली वारा।
संगीताचे ज्ञान देई शुभ्र वाहता झरा।

घट्ट बिलगून वेली आधारास राहती।
दृढ विश्वासाची शिकवण तरुवर देती।

फुलपाखरे बागडती फुलांफुलांवरून।
आनंदाचा उगम स्तोत्र गंधळतो त्यातुन।

नदी दौडते आवेगे विलीन होते सागरी।
प्रेम समर्पणाचा भाव मिळे तेथे सत्वरी।

न आटणार कधीही ज्ञानझरा।
होई जीवन समृद्ध कास त्याची धरा।
--सुनील पवार..✍🏼
गुरुपौर्णिमेच्या हार्दिक शुभेच्छा

|| मैत्री तुझी अन माझी ||

|| मैत्री तुझी अन माझी ||
===============
मैत्री कृष्ण सुदाम्याची
मैत्री आत्म्या परमात्म्याची..
ना रंक ना रावाची
मैत्री पवित्र नात्याची..!!

मैत्री दुयोधन अन कर्णाची
मैत्री स्वार्थ निःस्वार्थाची
मैत्री अपेक्षा अन उपेक्षाची
तरीही वेगळ्या अर्थाची..!!

मैत्री तुझी अन माझी
मैत्री शब्द अन काव्याची
अनोळखी परी ओळखीची
सावली जशी विसाव्याची..!!
*****सुनिल पवार......
��������������
|| मैत्री दिनाच्या हार्दिक शुभेच्छा ||