दाखवून दे..

दाखवून दे..

मला कळत नाही
तुझ्या अवकाळी येण्याला
काय अर्थ असतो..?
सांगशील का जरा,
त्यात कोणता स्वार्थ असतो..??

उगाच परमार्थ साधल्याचा
तू आव आणू नको..
अन् माझ्या संयमाचे धनुष्य
तू नाहक ताणू नको..!!

आता स्वागत तर दूर
पण तुझ्याकडे
ढुंकूनही पाहणार नाही..
आटून गेलेल्या झऱ्यातून
पाण्याचा थेंबही वाहणार नाही..!!

तुला यायचंच असेल पुन्हा
तर ऋतूंना सोबत घेऊन ये..
माझ्या नजरेतले इंद्रधनुष्य
तुझ्या आभाळी लेवून घे..!!

जमलंच तर पुसून दाखव
माथ्यावरचा अवकाळी शिक्का..
उगाच वरपांगी सोंग नको
दाखवून दे कृतीतून,
इरादा आपला पक्का..!!
***सुनिल पवार...✍️