|| अश्वत्थामा ||

|| अश्वत्थामा ||
************
अश्वत्थाम्याच्या जखमेस
का कोणी पाहिले नाही..
दूध आहे का पाणी
हे त्यानेही जाणले नाही..!!

द्रोण पुत्र तेजस्वी
मुकुट मणीसह जन्माला..
अमरत्व लाभले जरी
तरी का लयास गेला..!!

का घडला तो असा
कोणी कधी विचारले नाही..
शल्य त्याच्या मनाचे
का कोणीच जाणले नाही..!!

पित्यानेही पुत्राकडे
लक्ष कधी पुरवले नाही..
असोनी वीर धनुर्धर
विजयास त्याने वरले नाही..!!

ब्राह्मण पुत्र असूनही
हीन कृत्य करता झाला..
वीर धुरंदर सेनानी
पितृ हत्येने बिथरला..!!

वाहत गेला अधर्म प्रवाही
सुडाग्निने मन पेटवले..
अमरत्वाच्या कवचानेही
मग त्यास ना तारीले..!!

निद्रेत घात करता झाला
युद्ध धर्म विसरला..
ब्रह्मास्त्राचा धनी तो
कुचकामी इथे ठरला..!!

निर्दये कापले पांडव पुत्र
बाळ गर्भातील वेधू पाहिला..
मुकुट मणीस मुकला
भळभळत्या जखेमेचा भार वाहिला..!!

सरता सारासार विचार
कडेलोट अंधारी झाला..
वरदानही मग शाप ठरले
लपवून वदन फिरू लागला..!!

फिरतो अजूनही अंधारी
अश्वत्थामा तो सैरावैरा..
तुम्हास कधी दिसला
सांगा कोणी कुठे पाहिला..!!
******सुनिल पवार....