।। हाय फाय ।।

।। हाय फाय ।।
ह्या चोरांच करायच काय..??
काव्याला इथे फुटलेत पाय..!!

साळसूदपणाचा आव काय..??
आम्ही त्या गावाचेच नाय..!!

प्रोफाइल ह्यांचे हाय फाय..
चोरी शिवाय आहेच काय..!!

प्रतिभेस ह्यांच्या वावडं नाय..
गावल हातात घबाड काय..!!

अशी प्रतिभा ह्यांची संपन्न हाय..
एक नावचं तर बदलायचं हाय..!!
*चकोर*

।। विश्वास / घात ।।

।। विश्वास / घात ।।
हाती मी तुझ्या दिले माझे हात होते..
विश्वासा माझ्या लावले तू घात होते..!!

ह्रदय माझे वेडे तुझेच गुण गात होते..
तुझे मात्र सारेच बोलाचेच भात होते..!!

दिवस रात्र माझे स्वप्नात जात होते..
लाविलेस खुबीने सुरुंग तू आत होते..!!

मुर्तिस मी तुझ्या पुजले अंतरात होते..
लक्ष्य सारे तुझे लागले चढ़ावात होते..!!

प्रेम माझे जसे पावसाळी रुजवात होते..
जीवनाच्या पटावर शय आणि मात होते..!!
*चकोर*

।। श्रावण ।।

।। श्रावण ।।
रिमझिम बरसती श्रावण धारा...
वाहे धुंद अवखळ वारा...
शीत लहर स्पर्शे अंगाला..
अवचित उठे गोड शहारा..!!

बेभान होई नदीचा किनारा..
धाव घेई भेटण्या सागरा..
उधान त्यांचे सांगुन जाई..
धुंद मिलनाचा गोड उबारा..!!

सुंदर दिसे श्रृष्टिचा नजारा..
पाना फुलांचा बहर प्यारा..
उंच हिरव्या पर्वत रांगा..
शुभ्र धवल वाहे झरा..!!

सजली नटली तृप्त धरा..
हिरवा शालू दिसे गोजिरा..
ऐसा श्रावण भावे मनाला..
फुले अलवार मन पिसारा..!!
*चकोर*

II टाकळा II

II टाकळा II
आला आला पावसाळा..
रुजून आला  टाकळा..
न जाणे कोणी पेरीला..
वाटेवर मस्त बहरला..!!

हिरवे हिरवे गालिचे..
जणू निसर्गाने पसरले..
गोल सुबक पानावर..
पित सुमन बहरले..!!

दान विपुल निसर्गाचे..
सुज्ञ माणसाने हेरले..
जीवनसत्वाचे भांडार..
मग आहारातून घेतले..!!
*चकोर*

।। म्हणुनच रे वेड्या ।।

।। म्हणुनच रे वेड्या ।।

ठाउक आहे तुला..
तू मला आवडतोस..
म्हणुनच का रे..
तू असा मज छळतोस..!!

कधी धुंद बरसतोस..
कधी लुप्त होतोस..
असा कसा रे..
खेळ नित्य खेळतोस..!!

उशिरा जरी आलास..
चिंब मज भिजवतोस..
अधुऱ्या श्वासांना मग..
गंध नवा देतोस..!!

हौस तुलाही आहे पण..
अलिप्त तू भासवतोस..
भिजवल्या शिवाय सांग ना..
शांत कुठे बसतोस..!!

विरहाच्या क्षणांतुन तू..
प्रेम नवे फ़ुलवतोस..
म्हणुनच रे वेड्या..
तू मला आवडतोस..!!

*चकोर*

II नसतेस तू घरात जेव्हा II

II नसतेस तू घरात जेव्हा II

तू नसतेस घरात जेव्हा..जीव होतो कावरा बावरा..
अन घरात पडून राहतो..कामाचा नुसताच पसारा..!!

सुरवात कुठून करावी..काहीच मज समजत नाही..
अन चहा शिवाय बनाविता..मजला काहीच येत नाही..!!

उठण्यापासून बोंब असते..गजराची ही सवय नाही..
तिच्या एका हाके शिवाय..झोप काही उडत नाही..!!

चहा पाजायाला ती नसते..बनवायला जीवावर येते..
अन बनवली जरी जिवावर..चव तिच्या सारखी नसते..!!

बाबा शाळेला उशीर होतोय..मुलांचा धोशा सुरु होतो..
तयारी त्यांची करता करता..माझा tom & jerry होतो..!!

कामावर हमखास लेट होतो..boss हातात मेमो देतो..
घरात तिच्या नसण्याने..ऑफिस मध्येही गोंधळ उडतो..!!

थकून भागून घरी येतो..पुन्हा चक्र चालू होते..
जेवणा मागे मग खिशाला..रग्गड अशी चाट बसते..!!

नसतेस तू घरात जेव्हा..किंमत तुझी कळते तेव्हा..
तू सौख्याचा अमुल्य ठेवा..वाटतो मज तुझा हेवा..!!
*चकोर*

II मनुष्य II

II मनुष्य II
घाव देतो..मलम चोळतो..
दोन्ही काम मात्र मनुष्य करतो..!!

आग विझवतो अन लावतो..
एका तोंडाने दोन्ही काम करतो..!!

असा कसा तो विचित्र वागतो..
कधी उलटा कधी सरळ चालतो..!!

दोन मनाचा एक माणूस दिसतो..
कळेना यातील खरा कोण असतो..!!

विचार नका करू तो असाच वागतो..
जाळ्यात त्याच्या भला भला फसतो..!!
*चकोर*

हे..ना..ते

हे..ना..ते

हे..ना..ते..कळेना कसले..
कधी हसले..कधी फसले..!!

हे..ना..ते..असे कसले..
कधी खुलले..कधी रुसले..!!

हे...ना...ते..बिज कसले..
कधी रुजले..कधी कोमेजले..!!

हे...ना...ते..स्वप्न कसले..
कधी सजले..कधी थिजले..!!

हे...ना...ते..सुर कसले..
कधी जुळले..कधी भरकटले..!!

हे...ना...ते..मोती कसले..
कधी माळले..कधी बिखरले..!!

हे...ना...ते..जरी संपले..
अश्रूत भिजले..पवित्र झाले..!!

हे...ना...ते..तरी जपले..
मनाच्या सागरात..मोत्याचे शिंपले..!!

*चकोर*

II रूप गर्विता II

II रूप गर्विता II
तू रूप गर्विता तुझी अदा निराळी..
खेळे राधिका जैसे यमुना जळी..!!

मुग्ध लावण्य घेतोय ग माझा बळी..
चोरून पाहतो तुज मी सांज सकाळी..!!

वेडावते मन फिरते तुज भोवताली..
हृदय पाखरू हेलकावतेय वर खाली..!!

नजर वाटेवरी तटस्थ जसे वृक्षवल्ली..
कानोसा घेतो मी प्रत्येक पावलो पावली..!!

घुटमळतो दारी बनून नजरेतला सवाली..
ऐक गा-हाणे मज प्रेम बाधा झाली..!!

माळीन चंद्र तारे कुमकुम वजा भाळी..
होशील का सांग तू माझी घरवाली..!!
*चकोर*

II मिश्किल प्राजक्त II

II मिश्किल प्राजक्त II

प्राजक्त मिश्किल बहरला..
आसमंती गंध दरवळला..
सहवासास मग त्याच्या..
जो तो इथे भुलला..!!

करिता सागर मंथन..
देवेन्द्रास तो लाभला..
भावाला सत्यभामेला..
श्रीकृष्णे भूवरी आणिला..!!

परसदारी तयास प्रेमे..
सत्यभामे जोपासिला..
आस तिज फुलांची..
कौतुके न्याहळी त्याला..!!

पण काय म्हणावे..
त्या प्रभूच्या मायेला..
नकळे ती कोणाला..
अघाध असे त्याची लीला..!!

हट्ट पुरवला सत्यभामेचा..
परी फुले न मिळती तिला..
वंचित राही सत्यभामा..
फुले मिळती रुक्मिणीला..!!
*चकोर*

।। मन पाऊस पाऊस ।।

।। मन पाऊस पाऊस ।।

एक छत्री आपण दोघ..
असेच कधी बसलो होतो..
विसरलीस तू सारेच..
मी अजुन तिथेच होतो..!!

दूर झालीस तू आता..
किती आळवू मी पावसाला..
फुटला न कधी पाझर तुला..
न फुटला त्या आभाळाला..!!

वैरान झाले धुंद तराणे..
उरले मागे पाऊस गाणे..
आला पाऊस गेला पाऊस..
प्राक्तन ठरले अश्रुत भिजणे..!!

नित्य आभाळ दाटून येते..
आठवणीत मन धावते..
सरी वर सर बरसते..
मन पाऊस पाऊस होवून जाते..!!
*चकोर*

।। तुझ्या भेटीसाठी देवा ।।

।। आषाढी एकादशीच्या हार्दिक शुभेच्छा ।।
*************************************
।। तुझ्या भेटीसाठी देवा ।।

तुझ्या भेटीसाठी देवा..
जीव वेडावला..
भक्ता भेटीसाठी जिथे..
देव विसावला..!!

वाट तुझी धरली देवा..
आलो पंढरपुरी..
एकादशी दिवशी द्वारी..
जमले वारकरी..!!

पाहण्या सोहळा अवघा..
स्वर्गही लोटला..
देवांसही दुर्लभ ऐसा..
विठू मज भेटला..!!

सुखावलो आता देवा..
पारणे फिटले..
दर्शन मात्रे तुझिया देवा..
पातक मिटले..!!

आशीर्वाद लाभों आम्हा..
नित्य तुझा देवा..
संतांचा सहवास घडो..
कृपा दृष्टि ठेवा..!!

*चकोर*

II विटाळ II

II विटाळ II
पुण्यवान तू देहाचा..
सुयेरात काय जन्माला..
वंचित झाला देवाला..
का विटाळ असा ठरला..!!

आक्रंदन बहु केला..
ना कोणास समाजाला..
बारा दिवसाचा जणू..
का वनवास तुज घडला..!!

मेला परी ना तू सुटला..
सुतकात पुरता फसला..
फे-यात तेराच्या असा..
का पुरता तू घुसमटला..!!

जाळून स्वतःस परतला..
स्नानाने शुद्ध जाहला..
स्पर्शण्यास ना धजला..
का स्वतःस परका झाला..!!

वृथा घमेंड मग कशाला..
का जपावे मी पणाला..
सर्व पातकाच्या धन्यास..
का पुण्यवान तू समजला..!!

जन्म मरणात असा फसला..
फेरा काही केल्या न चुकला..
पुण्यवान तव देहाचा..
का जन्माचा विटाळ झाला..!!
*चकोर*

II मन मनाचे II

II मन मनाचे II
मन मनाचे खेळ सारे..
भासतात का मनास न्यारे..
मन मनाच्या ह्या खेळात..
हार जीत कुठे असते का रे...!!

बुद्धी असो वा बळ असो..
मनास त्याचे काय वावडे..
मन मनाचे असते चंचल बावरे..
थोड़े शहाणे जरासे वेडे..!!

नसे मनाचा थांग कोणा..
मन मनाचे ते गुपित प्यारे..
आठवता मग पुन्हा सारे..
मन मनाचे का हेलकावते रे..??

मन मनाचे का हेलकावते रे..??
*चकोर*

।। वाट तुझी पाहतो ।।

वाट तुझी पाहतो...

काय तुझ्या मनात
पाठ फिरवली क्षणात..
व्याकुळ झाला जीव
मळभ दाटले मनात..!!

आटून गेल्या नद्या
परागंदा झाले झरे..
येणार तरी कधी
दिवस त्यांना बरे..!!

मरण पंथास लागले
तहानलेले जीव सारे..
राख झाले रान हिरवे
जीवदान तयांस दे ना रे..!!

वाट तुझी पाहतो आम्ही
भरून पाऊस डोळ्यात..
अंत नको पाहू असा
ये सत्वरी दाटून मेघांत..!!
--सुनिल पवार...✍️

II प्रतीक्षा न संपणारी II

II प्रतीक्षा न संपणारी II
न संपणारी प्रतीक्षा,
मी आजही करतो आहे..
भोवताली तुझ्या,
जीव अजूनही घुटमळतो आहे..!!

नव्हत्या काही चुका,
भरपाई मी करतो आहे..
आसवांच्या वर्षावात,
देह अजूनही जळतो आहे..!!

तीळ तीळ मरून नित्य,
मी जगणे सुकर करतो आहे..
दिल्या घेतल्या वचनांचा,
तो शब्द अजूनही छळतो आहे..!!

तुटल्या सा-या माळा,
मी आठवणीत गुंफतो आहे..
सुकल्या प्रेम फुलांचा,
गंध अजूनही दरवळतो आहे..!!
*चकोर*