|| तू निघून गेलास अन ||

|| तू निघून गेलास अन ||
================
कळत नकळत
तू झिरपत होतास
भिंतीतून, छतातून..
अन
रुजत होता ओलावा
तू गाळलेल्या
प्रत्येक थेंबा थेंबातून..!!

तुझे आसपास वावरणे
हेच
माझ्या सृष्टीचे सावरणे होते
भाळीचे ठसठशीत लेणे होते..
तू झिरपत होतास अंतरबाह्य
म्हणूनच
सुकोमल फुलांचे डवरणे होते..!!
तुझे झिरपण्यात
कधी
सख्याचे हरपणे भासायचे
तर कधी
बापाचे निरखणे असायचे..
पण
तुझे ताडन कधी कधी
मन पिळवटून टाकायचे..!!
तुझ्या अस्तित्वावरच
टिकून होते माझे मुक्त बहरणे
पण
तू निघून गेलास अन
बघ छळू लागलाय उन्हाळा..
विखारी नजरेच्या त्या विखारी ज्वाळा
असह्य होताहेत रे
त्यांच्या कामुक झळा..!!
***सुनिल पवार...✍🏼