|| शामल रंगात ||

शामल रंगात..

भिजवु नको तू नाहक कान्हा
बघ आटल्या विहरी, तळी..
अन् थेंब थेंब पाण्यासाठी
वणवण करती पोरी बाळी..!!

वाटत असेल तुला कान्हा
मी जपतेय माझी कोरी साडी..
पण पाहवत नाही रे मला
अशी नाहक पाण्याची नासाडी..!!

कान्हा, कळतयं रे मला
तू रंगवु पाहतो तुझ्या ढंगात..
पण बघ कशी भेगाळतेय भुई
महाराष्ट्रच्या दुष्काळी भागात..!!

तू करू नको उगाच शिरजोरी
कान्हा मारू नको रे पिचकारी..
तुझ्याच शामल रंगात रंगते
मी तुझीच रे राधा बावरी..!!
--सुनिल पवार..✍️