|| बेशक ||

|| बेशक ||
=======
फाटलेलंच जीवन जागोजागी
ठिगळासही कुठे आधार नाही..
जगास करू द्या बेशक भांडवल
इतकाही मी लाचार नाही..!!

तुम्ही या खुशाल निवडून त्यावर
तुमच्यातील मी उमेदवार नाही..
किती मागाल जोगवा मताचा
विकाऊ मी मतदार नाही..!!
का लावताय बोली गरिबीची?
तुमच्या चैनीचा हा बाजार नाही..
बंद करा हे वाटप कुबड्यांचे
सक्षम मी नादार नाही..!!
किती फिराल हो घेऊन आरसे
काय भरवसा तडकणार नाही..
लावा कितीही आग शब्दांनी
शांतच मी भडकणार नाही..!!
ह्या मातीत रोवून पाय उभा मी
सहजा सहजी पडणार नाही..
कोरड्या तुमच्या सहानभूतीत
खात्रीने मी बुडणार नाही..!!
****सुनिल पवार....✍🏽😊