|| घडी ||

🌺तिच्यातली ती🌺
=============
|| घडी ||
=●=●=
घडी करत होतो
चादरींची
तशी नेहमीच करतो..
उशिरा उठणारा मी
न करून कुणास सांगतो..!!

इतके दिवस नव्हतं
पण
आज तिचं लक्ष गेलं
म्हणाली,
छान मारतो तू घडी..
अशी
मलाही जमणार नाही
अगदी तंतोतंत
नाही कुठेच वेडीवाकडी..!!
मी हसलो म्हणालो,
अगं
यत्किंचीतशी ही चादर आहे
त्यास
विशेष मी म्हणणार नाही..
खरी कलाकार तूच आहेस
कारण
तू बसवलेल्या घडीचे अनुकरण
प्रत्यक्ष
ब्रह्मदेवालाही जमणार नाही..!!
*****सुनिल पवार....✍🏽