|| शर्यत ||

|| शर्यत ||
=======
निखळता हरवली जगण्याची
अन बदलली रीत वागण्याची..
लक्षाचा ना ठावठिकाणा
ही शर्यत अनोखी पळण्याची..!!

तू पळतो का मी पळतो
प्रश्न उगाच मनास छळतो..
जुंपून घेतलंय घाण्याला
पण नंबरासाठी जीव जळतो..!!
हे चित्र विचित्र दिसे धूसर
जसे दुरून साजिरे डोंगर..
गर्दी जमलीयं पोट भरू
पण मृगजळीच सारे लंगर..!!
खेळे नियती आंधळी कोशिंबीर
जो तो खेळण्यास दिसे अधीर..
असमाधानी मार्ग मोहाचा
शोषून घेतोय सांडून रुधिर..!!
****सुनिल पवार...✍🏽