|| तेव्हा/आता ||

|| तेव्हा/आता ||
==========
तेव्हा
त्याच्या बासरीत
ती सदा रममाण
तिच्या ओठी
सदा त्याचेच नाम..
ती राधा प्रिया त्याची
अन
तो मोहन घनशाम..!!
तेव्हा
तीचा सोज्वळ
सुकोमल स्वभाव
त्याच्या अस्तित्वावर
तिचाच प्रभाव..
ती रुक्मिणी भार्या त्याची
अन
तो कृष्ण सखा माधव..!!
तेव्हा
ती तापट भारी
तिचा हट्ट हेच हत्यार
तो राखण्या तीची मर्जी
दिसतो नित्य तयार..
ती सत्यभामा अभिलाषी
अन
तो निर्मोही मनोहर..!!
तेव्हा
ती समर्पित
त्याच्या पायी
ती विणेची
स्वर करुणाई..
ती निर्मळ मीरा जाई..
अन
तो मुरलीधर ठायी ठायी..!!
आता
ती राधा,रुक्मिणी,
भामा,मीरा
एकाच नदीच्या
अनेक जलधारा..
अन
माधवाने
न जाणे गाठला
कोणता
गुपचुप किनारा..!!
***सुनिल पवार...✍🏽