|| शृंखला ||

💝तिच्यातील ती💝
=============
शृंखला..

म्हणाली ती
किती प्रेम करतो
एकदा शब्दात कळू दे..
म्हटले मी
बघ ना जरा नजरेत
बिलकुल नको ढळू दे..!!

म्हणाली ती
हे रे काय..?
आवाज कुठे त्यात.?
म्हटले मी
ऐक ना नीट
ती लय आहे हृदयात..!!

म्हणाली ती
काही तरीच काय.?
त्यास स्पंदन म्हणतात..
म्हटले मी
बरोबर आहे तुझं
पण ती प्रेमातच उमटतात..!!

म्हणाली ती
फसवतोस तू
हे काही खरे उत्तर नाही..
म्हटले मी
भरून बघ ना श्वासात
या सम दुसरे अत्तर नाही..!!

म्हणाली ती
कळत नाही का
पण शब्दात उणीव भासते..?
म्हटले मी
शक्य आहे
पण जाणीव तशी नसते..!!

म्हणाली ती
असेल तसं
तर दाखवून दे दाखला..
म्हटले मी
मिटून घे डोळे
अन सजवून घे शृंखला..!!
***सुनिल पवार...✍🏽😊