|| कुंभकर्ण ||

|| कुंभकर्ण ||
========
अहो कुंभकर्ण आहे तो
असा सहजा सहजी
उठणार नाही..
त्याच्या उत्तुंग घोरण्यापुढे
तुम्हास कंठ फुटणार नाही..!!

वाजवा कितीही रणभेरी,
करा किती आक्रोश
द्या शाब्दिक फटकारे,
वा काढा कितीही चिमटे..
गेंड्याच्या कातडीचा तो
नाही बधणार तुम्हास
त्याच्यापुढे कुचकामी
तुमचे भाले अन काटे..!!
नाही,
तुम्ही करा खुशाल प्रयत्न
तुम्हास कोणी अडवणार नाही..
पण मुदतीचा हा रोग त्याचा
तो मुदतीशिवाय उठणार नाही..!!
उठलाच जरी चुकून कधी
तो तुमच्या कोलाहालाने,
अन सज्ज झाला लढायला
तुमच्या बाजूने..!!
तर तुम्ही जिंकलात
असं समजणे काही
शहाणपणाचं लक्षण नाही..
कारण,
हे धूड इतकं मोठं आहे
की ते पडल्यावरही
सर्व सामान्यांना
चिरडल्याशिवाय राहणार नाही..!!
*****सुनिल पवार....