|| महाभारत ||

|| महाभारत ||
=========
आकाशातील उंच तारा
अकस्मात जसा निखळतो..
अर्धसत्याचा रथ धर्माचा
जमिनीवर तसाच उतरतो..!!

मैत्रीच्या निष्फळ वचनास
कर्ण वेडा उगाच जागतो..
परिवर्तनाच्या अग्निकुंडात
स्वःदेहास अर्पण देतो..!!

पुत्रप्रेमही तसेच धृतराष्टी
जो तो स्वःपुत्रास जपतो..
चक्रव्यूहात द्रोण हताश
अभिमन्यूचा मृत्यू पाहतो..!!

लालसेचा आंधळा सोस
डोळे मिटून राज्य करतो..
गांधीरीच्या ममतेलाही
पट्टीचा उपचार दिसतो..!!

कुटीलतेच्या कपट नीतीचे
शकुनी रोज फासे फेकतो..
दुःशासनी क्रूर लांडगा
द्रौपदीचे वस्त्र फेडतो..!!

शिष्टाईचा कृष्ण सखा
अधूनमधून भेटत असतो..
पण माणसातला दुर्योधन
युद्ध सदोदित छेडत असतो..!!
***सुनिल पवार...✍🏼