🌹गूढी पाडवा तसेच नव वर्षाच्या हार्दिक शुभेच्छा🌹

| गुढीपाडव्याच्या हार्दिक शुभेच्छा ||
======================
मना मनात रुजावी
नव चैतन्याची गुढी
प्रीत पालवी फुटावी
जावी निखळून अढी..!!

पाने पंचक आंब्याची
साक्ष देती मांगल्याची
नजरेत सजवावी
प्रेम मूर्ती वात्सल्याची..!!

माळ साखरी गोडवा
जिभेवर रेंगाळावा..
कडूलिंब सेवनाने
तमोगुण दूर व्हावा..!!

वस्त्र रेशमी पताका
उंच उंच लहरावी..
सद्भावनेची महती
सर्वदूर पसरावी.!!

नवबहर झेंडूंचा
मनी केसर रुजावा..
रांगोळीच्या नवरंगी
नित्य खुलून दिसावा..!!

चैत्र पालवी कोवळी
सोन झळाळी किरणी..
देतो शुभेच्छा मनस्वी
पाडव्याच्या शुभदिनी..!!
*****सुनिल पवार....✍🏼