|| शाईचा पदन्यास ||

|| शाईचा पदन्यास ||
=============
आठवतात का
त्या बालपणीच्या चुका
त्या चुकलेल्या मात्रा
त्या वेलांटया, तो काना..
आईने बाबांनी
हात धरून दिलेले धड़े
अन
करुन दिलेल्या सुधारणा..!!

गिरवणं पाटीवर होते
मात्र
मनात ठसले जात होते..
पाण्याच्या एका थेंबात
चुकीचे फ़ुसले जात होते..!!
पुढे पाटी सरली
पेन्सिल वही आली
चुका खोडायला
खोडरबराची जंत्री
लाभली होती..
कधी लीलया खोडता आली
कधी पानंच फाटली होती..!!
पेन्सिलही नंतर मागे सरली
पानाच्या दिमतीला पेन आले..
चुकांचे दिसणे तितकेच ठळक झाले
खोडण्यास त्या रबरासही ना जमले..!!
आतासा
मी घेतोय आधार
त्या पांढऱ्या शाईचा
चुका लपविण्यास..
तरीही कळतात जगास
त्या चुका
दर्शवितो ठळकपणे उमटणारा
तो पांढऱ्या शाईचा
पदन्यास..!!
🙏🌹🙏🌹🙏🌹🙏
****सुनिल पवार....