|| राज्य ||

|| राज्य ||
======
छोटंसं राज्य होतं
तेव्हा
तो झेलायचा
अन ती बोलायची..
त्याच्या कृतीला
ती हसत अनुमोदन द्यायची..!!

आता राज्य तेच आहे
मात्र
खातेदार वाढले
छोट्याशा राज्याचे
भावी वारसदार झाले
सहाजिक
कुठे कर वाढवावे लागले
तर कुठे घटवावे लागले
कधी वेळेला ऋण काढून
सण साजरे करावे लागले..!!
अजून ही राज्य तेच आहे
ती ही तशीच बोलते
मात्र
तो लगेच खंडन करतो
विरोधकांच्या बाकावर सारखा..
ती ही त्याच्या निर्णयाला
केराची टोपली दाखवते
सत्ताधारी पक्ष असल्या सारखा..!!
राज्य तसं छोटंच आहे
मात्र संसदेत
गदारोळ वाढता आहे..
संभ्रमित नवोदित तटस्थ दिसतोय..
मला वाटतंय
तो अनुभव घेतोय..
बोलू पाहतोय मध्ये
मात्र संधीच मिळत नाही..
सत्ताधारी म्हणतात
त्याला काही कळत नाही..!!
राज्य अजून तरी छोटंसं आहे
उद्या कदाचित विलग होईल
आजचा सत्ताधारी
उद्या पायउतार होईल
तसा
भावी वारसदार ठरलेलाच आहे
तोच
सत्ता काबीज करणार आहे
आता
पाहायचं मात्र इतकंच आहे
नेमकं परिवर्तन काय घडणार आहे..?
का कारभार जैसे थै राहणार आहे..!!
****सुनिल पवार...✍🏽