|| मोकळा श्वास ||

|| मोकळा श्वास ||
=●=●=●=●=●=●=
कधी विचार येतो मनी
जाणते अजाणतेपणी..
सकारास धरून गृहीत
का नकाराचं भरतो पाणी..??

हा अट्टाहास तरी कसला.?
उगा शब्दांना पेटवण्याचा..
राख झाल्या भावनांना
मृगजळात भेटवण्याचा.!!

कुठे पटतयं मनास तरीही
पोसतोय उगाच ठिणग्यांना..
कळे ना कसला मिळतो उबारा
का गोठवतो मी संवेदनांना..??

हा शवाधिन झालेला देह
का असा तिरडीवर सजतो..
चार घोड्यांच्या खंद्या रथावर
नक्राश्रूंच्या कौतुकात रांगतो..!!

वाटे सत्वर पहुडावे चितेवर
व्हावा भस्मसात निर्जीव आभास..
असंतोषाच्या गिळून ज्वाळा
घ्यावा वाटतो मोकळा श्वास..!!
***सुनिल पवार...✍🏼