|| मी तुझीच रे ||

|| मी तुझीच रे ||
×××××××××××
आज अचानक कातर वेळी
नकळत ती समोर आली
ओळखले का तू मला..??
प्रश्न अचानक विचारती झाली..!!

म्हणालो मी नाही नाही
नक्की तू कोण ग बाई
उत्तरली ती सांगते सारे
करू नको रे उगाच घाई..!!

काय ओळख देऊ नक्की
म्हणू का, तुझ्या शब्दांची शाई
का भावनेची म्हणू उतराई
इतके पुरे का देऊ आणखी काही..!!

नको अशी तू कोडयात बोलू
समजेल असे बोल ग बाई
कुठे पाहिलय बर..??
मला कही आठवत नाही..!!

इतक्यात कसा रे विसरलास..??
गुंफत होतास ना तूच शब्दात
मिरवत होतास संमेलनात
लोक देत होते तुजला दाद..!!

भावनेत तू जवळ येतोस
विरहात कुठे दूर बैसतोस
कधी कारुण्याची किनार देतोस
कधी आठवणीत रममाण होतोस..!!

कधी तेज तलवार होतोस
कधी विनम्र हार होतोस
कधी हास्य फुव्वार होतोस
कधी कुणाचा आधार होतोस..!!

माझ्याच साठी ना तू हे करतो
तरी ही येईना तुज ओळखता
असा कसा रे तू विसरभोळा
मी तुझीच रे प्रिय कविता..!!
:
मी तुझीच रे प्रिय कविता..!!
***********सुनिल पवार.....