|| संयुक्त अलिप्त ||

|| संयुक्त अलिप्त ||
============
कधी संयुक्त असणारे
भांड्यात मिसळून वावरणारे
ते भांडे,
सुखाच्या शोधात
बरोबरीच्या भांड्यातुन
हट्टाने अलिप्त झाले..
भासले त्यास मुक्त काही काळ
न कसला आवाज
आता
सारे कसे शांत शांत झाले..!!

चार भिंतीच्या फडताळात
विजयाच्या अविर्भावात
हर्ष उल्हासात
सजवली त्याने
दोन भांड्याची आरास..
पण,
उशिरा कळले त्या भांड्यास
ज्यासाठी केला होता
इतका अट्टाहास
तोच होता केवळ भास..!!
नाद रव ना समजला
मुकला अस्सल संगीताला
दोष तोच हलक्या कानाचा
हे कळून चुकले त्याला..
पण
निघून गेली वेळ
आता जमवतोय नव्याने भांडी
शोधू पाहतोय आजूबाजूस
पण मिळणार कशी..?
तशीच हक्काची भांडी
पण निर्णय हा त्याच्याच होता
त्याने निवडले होते
स्वतःहुन त्याच्या एकांताला..!!
***सुनिल पवार...✍