II पलटवार II

II पलटवार II
========
आज कामावरुन येऊन फ्रेश होऊन ज़रा निवांत व्हाट्सअप चाळत बसलो तोच आमच्या सौ म्हणाल्या, आज तुमच्या चिरंजीवाने एक प्रताप केलाय.. मी चिरंजीवाकड़े डोळे वटारुन बघत म्हणालो आता काय केले उपद्याप..?? त्यावर सौ उत्तरल्या..तुम्ही आणलेल्या नविन छत्रीचा दांडा मोडला.. (एक छद्मी कटाक्ष टाकत पुन्हा) कसली भंगार छत्री आणलीय देव जाणे.. मी तिच्या त्या खोचक बोलण्यावर तितकेच खमके उत्तर देत म्हणालो..ब्रांडेड छत्री आहे ती..दुकानातुन खरेदी केलेली..बिल सुद्धा आहे.. हो ना मग तुटली कशी..?? सौ. ने पुन्हा त्याच खोचकतेने प्रतिप्रश्न केला..तिच्या प्रतिप्रश्नावर मी चिरंजीवाकड़े कटाक्ष टाकत उत्तरलो..माकडाच्या हाती कोलीत दिल्यावर काय होणार..?? आगच लागणार ना..?? माझे ते उत्तर ऐकून सौ गप्प झाल्या..मात्र चिरंजीव मारक्या म्हशी सारखा बघत गप्प बसून राहिला..

थोड़ा वेळ गेला..वातावरण हलके झाले..तसा चिरंजीव उठला आणि मला हळूच म्हणाला पप्पा तुमचा कोणता चष्मां खराब झाला आहे..?? (कोपऱ्यात काढून ठेवालेल्या जुन्या चष्म्याकड़े बोट दाखवत) हा चष्मां की तुम्ही आता चढवला आहे तो चष्मां..? मी सहज म्हणालो तो..अरे हां आता घातला आहे तो नविन आणला नाही का मी..?? (कोपऱ्यातल्या चष्म्याकडे बोट दाखवत) तो चष्मां खराब झालाय..त्याने भुरकट दिसत होते.. माझ्या उत्तरावर चिरंजीव पटकन म्हणाला मग बरोबर छत्री तुटणारच ना..?? तुम्ही छत्री आणली तेव्हा हा नविन चष्मां कुठे होता..?? खी..खी..खी...
आता बोला..😀
****सुनील पवार.....