|| तपस्वी मी निशेचा ||

|| तपस्वी मी निशेचा ||
=============
माळुन चंद्र तारे तू
वाऱ्यावर अशी लहरु नको
ह्या रात्रीच्या धुंद प्रहरी
रातराणी तू बहरू नको..!!

वेडावतो मज दरवळ तुझा
तू सुहासे मज मोहवू नको
मोहक तुझ्या गंधास्त्राने
तू नादास मजला लावू नको..!!

निशब्द नीरव शांत चहुओर
तू भंग तिचा करू नको
मिसळून श्वास श्वासात असा
तू रंग लीला स्मरु नको..!!

एक तपस्वी मी निशेचा
तू साधना माझी तोडू नको
मिटल्या तुझ्या नेत्र फुलांनी
तू स्वप्नी नाते जोडू नको..!!
******सुनिल पवार......