|| पुसता काय हो ||

|| पुसता काय हो ||
============
पुसता काय हो,
कविता काय असते..
मनाच्या दुधावरची
कविता साय असते..!!

पुसता काय हो,
कविता कशी बनते..
विचारांच्या टाकसाळीतले
ते नाणे खणखणते..!!

पुसता काय हो,
कविता कशी सजते..
रूपक अलंकारातून
ती भावनेत गजबजते..!!

पुसता काय हो,
कविता कशी असावी..
हृदयाचा वेध घेत
अलगद रुतून बसावी..!!

पुसता काय हो,
कविता कशी लिहावी..
अतरात्म्याच्या गाभ्यातून
ती उत्स्पुर्त प्रकट व्हावी..!!
****सुनिल पवार.....