।। शाप ।।

।। शाप ।।
***********
आपलाच शाप आता
आपणास भोवतोय..
कुऱ्हाडीचा दांडा कसा
गोतास काळ ठरतोय...!!
अनेक खस्ता खाऊन
ज्या बाळास पाळतोय
तोच बाळ आता
माय बापास छळतोय..!!
ज्या नारीच्या पोटी
नर जन्म जो घेतोय..
त्याच नारीचा नराधम
गळा आता घोटतोय..!!
साता जन्माच्या सोबतीची
वचने जो देतोय..
पहिल्या जन्मातच भार्येला
दूर तो लोटतोय..!!
दरबारात देवाच्या जो
हार फुले चढवतोय..
कळ्या कोवळ्या उदरात
तोच आता खुडतोय..!!
असा कसा निर्दयी माणूस
का असा वागतोय..
रुचत नाही रे तुझे वागणे
मी निषेध व्यक्त करतोय..!!
**************सुनिल पवार......