।। बाप माणूस ।।

।। बाप माणूस ।।

बाप माणसाची कथा जरा विचित्र आहे
कथा कमी अन् व्यथाच जास्त आहे..
कुटुंबवत्सल जबाबदार अशी त्याची ख्याती..
वादळवाराही दिसतो त्याच्याच खांद्यावरती..!!

घामाची वस्त्रे स्वतःकडे राखून ठेवणारा तो
कुटुंबास मात्र तलम रेशमी पुरवत असतो..
बाप बिनदिक्कत फटके नेसून फिरत असतो
पण कुटुंब नेटके ठेवण्याकडे त्याचा कल असतो..!!

पाऊल घराबाहेर परंतु लक्ष घराकडे असते
सुरक्षेसाठी केवळ त्याचे नाव मात्र पुरेसे असते
तो असतो तेव्हा नसते भीती कधीच कुणाला
निश्चिंत होते कुटुंब अन् धन्यवाद देते त्याला ..!!

रडला नाही कधीच नाही अश्रु कधी ढाळले
आपल्याच हृदयात त्याने विशाल सागर पाळले..
तोच मेरू, तोच रवी तोच मंथनी स्वतः घुसळतो
कृपेचा सिंधु अतिविशाल रत्ने सुखाची उगळतो..!!

किती संकटे आली त्याने स्वतः लीलया झेलली
परंतु कुटुंबास ना कधी त्यांची झळ लागू दिली
वरून काटेरी पण आतून गोड गरा तो असतो
बाप माणूस फणसाच्या उपमेत चपखल बसतो..!!
--सुनिल पवार..✍️