तुझ्यासाठी...💞

तुझ्यासाठी...💞

दोन शब्द तुझ्यासाठी
कागदावर काय उमटले..
जीवनाची कविता झाली
अन् कवितेत जगणे आले..!!

तू नाही ओळखले कधी
पण जग ओळखू लागले..
तुझ्यावर जडलेले प्रेम
शब्दांतून ओघळू लागले..!!

जीवनाचा ऋतू कोरडा
तरीही शब्द पाऊस झाले..
डोळ्यांची दौत भरून आली
अन् लेखणीतून वाहू लागले.!!

तुला सुखावणारे हेच शब्द
हृदयातून साद घालू लागले..
तू अवचित दिली दाद अन्
शब्दंशब्द कृतकृत्य झाले..!!
--सुनिल पवार...✍️