|| मी तो कृष्ण मुरारी नाही ||

|| मी तो कृष्ण मुरारी नाही ||
=================
तू असशील अवखळ राधा
पण मी तो कृष्ण मुरारी नाही..
तू स्वर कोमल अलगुजाचा
पण माझ्या ओठी बासरी नाही..!!

डोह उरात जरी कालिंदीचा
पण तीरावर ती रंगत नाही..
गोपाळांचा मेळा सभोवताली
पण सुदाम्याशी संगत नाही..!!

स्वप्न तलम मोरपीसी नयनी
पण मोरपीस मस्तकी नाही..
अडीज अक्षरांचे प्रेम वेडे
पण शब्द माझे पुस्तकी नाही..!!

कोण देतो ते दाखले कशाचे
याचे देणेघेणे कोणास नाही..
कोण राधा अन् कोण कृष्ण?
याचे भान आता प्रेमास नाही..!!
***सुनिल पवार...✍🏼