|| याज्ञसेनी ||

|| याज्ञसेनी ||
=========
नाही समजली कोणा द्रौपदी
दुषणे अशी मग का लावली..?
खोडण्या तुमचे आरोप सारे
तुमच्यात आज उभी ठाकली..!!

पांचाल नरेश कन्या म्हणुनी
जन पुकारती मज पांचाळी..
पाच पतींची पत्नी म्हणुनी
तुम्ही हीणवली मज पांचाली..!!

दूषण मी मग कोणा लावू
भिक्षा समजून जीने वाटले..
ऐकुन बोल त्या मातेचे
उभे आभाळ जणू फाटले..!!
नियती घेई कसली परीक्षा
वाटली मज समजून भिक्षा
दोष माझा काय होता
कसली करता तुम्ही समीक्षा..!!

वरले मी ज्यास मनाने
ना प्रेम खरे त्या अंगी रुजले
नाही मजला कधी समजले
शब्द माझे कोणी पूजले..!!

होते जरी पाचांची पत्नी
समजे कोण मज संपत्ती..
विरोध माझा व्यक्त केला
तरी का हो तुम्हा आपत्ती..!!

वस्त्रास हात घाले तो पापी
पूत तुम्ही का तसेच प्रतापी
कुलटा ठरवून मोकळे होती
मदतीस ना येती कदापी..!!

व्यथित होऊन त्या शेऱ्याने
फिरते उरात घेऊन अग्नि
भस्म होईल जो छेडेल मज
ठेवा ध्यानी..
मी द्रौपदी, मी याज्ञसेनी..!!
******सुनिल पवार......