जवाब....

अलीकडे,
ठेकेदारीची बांडगुळं
नीतिमत्ता फस्त करत
जोमाने फोफावलेली दिसत आहेत..
संस्कृतीच्या पाळामुळातील रस पिळून
मस्तवाल झालेली त्यांची पिल्लावळ
हिरव्या रानाला
उजाड करताना दिसत आहेत..!!

वैराण उंट,
तंबू फाडून
हातपाय पसरू लागलाय
अन् हिरवळ
दिसेनाशी होत चाललीय
दिवसेंदिवस
दृष्ट प्रवृत्ती आवाक्याबाहेर होतेय
तिला आळा घालणे
आता कठीण होऊन बसलंय..!!

सूर्यावर थुंकण्याचे प्रकार
वरचेवर घडत आहेत
चिखलफेक तर आता
नित्यनेमाची झालीय
बरबटलेली गटारांची तोंडं
सताड उघडी दिसताहेत
त्यांच्या दुर्गंधीने
जीव मात्र नकोसा झालाय..!!

आता
संभ्रम असा आहे
की कळत नाही
कोणता फवारा मारावा
मुळापासून उखडावा
की तंबू गुंडाळून घ्यावा
की सुर्यालाच झाकावा?
अंधाराचे साम्राज्य
तसेही फैलावत आहे
की आता विटेचा जवाब
पत्थराने द्यावा..??
***सुनिल पवार...✍🏽