II रंग प्रेमाचे II

II रंग प्रेमाचे II
**************
रंग प्रेमाचे कसे आगळे वेगळे
कोणास कळले, कोणास छळले..
पड़ती प्रेमात इथे सारेच वेडे
कोणास लाभले, कोण जळले..!!

नाते प्रेमाचे ते राधेशी जुळले
प्रेम रुक्मणीस लीलया कळले..
सत्यभामेस ना कधी उमजले
प्रेमाने मीरेस नाहक छळले..!!

धरेचे प्रेम तरी कुठे निराळे
भास्करा भोवती ह्रदय जाळे..
शशी बिचारा तो रात्रभर झुरे
सिंधुचे त्याकडे लागलेत डोळे..!!

सरितेच्या प्रेमाचे मेघास उमाळे
अल्लड सरिता सागराशी खेळे..
वारा तो व्यर्थच बेभान वाहे
धरेच्या उदरी बीज कोवळे..!!

एकाच्या प्रेमात दूसराच पोळे
कोणाच मन इथे कोण सांभाळे..
प्रेमात वाहती निर्झर डोळे
प्रेमाचे हे कसले सोहळे..??
वेड्या...
प्रेमाचे हे कसले सोहळे..!!
**********सुनिल पवार....