|| मौनाचा संवाद ||

संवाद मनाचा...

बोलायचे नाही
भेद खोलायचे नाही
मनाचे गुपित 
मनात ठेवायचे काही..!!

हसायचे नाही
व्यर्थ रुसायचे नाही..
मनाच्या चकव्यात
नाहक फसायचे नाही..!!

टाळायचे नाही
प्रश्न पाळायचे नाही..
प्रेमातले प्रेम
तुला कळायचे नाही..!!

ठरवतो काही
अन् घडतेय काही..
मौनाचा संवाद
उगाच बोलतोय काही..!!
--सुनिल पवार...✍️

II अभिमन्यु II

II अभिमन्यु II
=========
अभिमन्यु कोवळा सुकुमार..
पार्थ पुत्र वीर रणझुंजार..
भेदुन चक्रव्यूह गाजवी रण..
छोट्या चणीचा रणधुरंदर..!!

चक्रव्यूह भेद शिकुन उदरात..
मजविला हाहाकार कौरवात..
मारण्या त्या एक विरास..
तुटून पड़ती कौरव एकजात..!!

निःशस्त्र झाला ना डगमगला..
एकटा पडला तरीही लढला..
अभिमन्यु चक्रव्यूहात फसला
लढता लढता धाराशाही पडला.!!

संकेत युद्धाचे न पाळले कुणी
निःशस्त्र वीरास निर्दये मारला..
निपचित पडला बाल धनुर्धर
जयन्द्रथे लत्ता प्रहार केला..!!

भेद जाणीला परी न सुटला
परतीचा तो मार्ग खुंटला..
अभिमन्यु तो वीर धनुर्धर
अधूऱ्या विद्याचा बळी ठरला..!!
********सुनिल पवार....

|| धर्म ||

|| धर्म ||
======
धर्म तुझा काय आहे
का जनमाणसात पाहे..
करशील कर्म निःकाम
सुहास सर्वदूर वाहे..!!

फिरू नकोस परिघात
कुपमंडूक घोळक्यात..
बघ विशाल आकाश
लक्ष तारे भरून त्यात..!!

जागव दृष्टिकोण व्यापक
सोड कल्पना भंपक..
नको मनात विकल्प
रुजव माणुसकीचा संकल्प..!!
*****सुनिल पवार...

|| भारत मातेचा लाल ||

|| भारत मातेचा लाल ||
===============
भारत मातेचा लाल
मूर्ति लहान पण किर्ती महान..
कणखर त्यांच्या नेतृवाचा
आम्हा भारतीयांस सार्थ अभिमान..!!

  जय जवान जय किसान
अतुल्य अमोघ दिला नारा..
श्रेय देऊन श्रमिकांस सारे
एक केला प्रवाह सारा..!!

जरी मेणाहुन मऊ स्वभावे
देशहितास्तव बनले लोह
भयकंपित शेजारी शत्रु
आला शरण मावळला द्रोह..!!

शत शत नमन तुम्हास शास्त्री
कर्तुत्व तुमचे अतिविशाल..
हृदयी तेवत ठेवू चिरंतर
तुमच्या विचारांची दिव्य मशाल..!!
*****सुनिल पवार....

|| साबरमतीच्या संता ||

|| साबरमतीच्या संता ||
===============

|| साबरमतीच्या संता ||
===============
साबरमतीच्या पूज्य संता
तुज पूजते जरी जनता..
नाव तुमचेच घेवून बापू
राज्य करतोय गब्बर नेता..!!
तत्व तुमची सर्व महान
परी नेत्यांनी केली लहान..
जयंती पुरतीच हो अहिंसा
हिंसेविना कुठे हलते पान..!!
जपतोय आता जो तो बापू
कृपया गैरसमज नसावा..
नोटांवरचा तुमचा फ़ोटो
तिजोरीतच नित्य वसावा..!!
हे ही तितकेच खरे बापू
इथे तुम्हालाच प्रथम मान..
तुम्हास खिशात ठेऊन म्हणतात
मेरा भारत महान..मेरा भारत महान..!!****सुनिल पवार....

|| याज्ञसेनी ||

|| याज्ञसेनी ||
=========
नाही समजली कोणा द्रौपदी
दुषणे अशी मग का लावली..?
खोडण्या तुमचे आरोप सारे
तुमच्यात आज उभी ठाकली..!!

पांचाल नरेश कन्या म्हणुनी
जन पुकारती मज पांचाळी..
पाच पतींची पत्नी म्हणुनी
तुम्ही हीणवली मज पांचाली..!!

दूषण मी मग कोणा लावू
भिक्षा समजून जीने वाटले..
ऐकुन बोल त्या मातेचे
उभे आभाळ जणू फाटले..!!
नियती घेई कसली परीक्षा
वाटली मज समजून भिक्षा
दोष माझा काय होता
कसली करता तुम्ही समीक्षा..!!

वरले मी ज्यास मनाने
ना प्रेम खरे त्या अंगी रुजले
नाही मजला कधी समजले
शब्द माझे कोणी पूजले..!!

होते जरी पाचांची पत्नी
समजे कोण मज संपत्ती..
विरोध माझा व्यक्त केला
तरी का हो तुम्हा आपत्ती..!!

वस्त्रास हात घाले तो पापी
पूत तुम्ही का तसेच प्रतापी
कुलटा ठरवून मोकळे होती
मदतीस ना येती कदापी..!!

व्यथित होऊन त्या शेऱ्याने
फिरते उरात घेऊन अग्नि
भस्म होईल जो छेडेल मज
ठेवा ध्यानी..
मी द्रौपदी, मी याज्ञसेनी..!!
******सुनिल पवार......

|| त्या क्षणाचा ||

|| त्या क्षणाचा ||
==========
त्या क्षणाचा मोह भुलवितो...
हिंदोळ्यावर मना झुलवितो..!!

बोलतेस तू बोल ऐसे
ह्रदय तार झंकारते जैसे
देह भान मी विसरतो
तृप्त कर्ण तरी आसुसतो..!!
त्या क्षणाचा मोह भुलवितो...ss

मारता तू मिठी आवेगे
पुलकित रोम होते जागे
बंध मनाचा हलके उसवतो
प्रेम भाव मनी प्रसवतो..!!

त्या क्षणाचा मोह भुलवितो..ss
द्वैत अद्वैत खेळ जरी हा
गंधित धुंद सुगंधा परी हा
परिमळ तो रोमांच फुलवितो
श्वास तुझा श्वासात मिसळतो..!!
त्या क्षणाचा मोह भुलवितो...ss

मिलनाचे फलित काय ते
ओढ़ तुझी मम जीवा लावते..
आठवणीत त्या नित्य राहतो
वाट तुझी क्षण क्षण पाहतो..!!
त्या क्षणाचा मोह भुलवितो...ss
हिंदोळ्यावर मना झुलवितो..!!
******सुनिल पवार......