|| परिणीती ||

|| परिणीती ||
=========
ही कोणती परिणीती
वादळास उध्वस्त करते..
खळबळ माजवून डोहात
चित्तास परावृत्त करते..!!

का गुंतते मन उगाच
आभासाच्या मृगजळात..
काय दडलेले असते असे
निसटून गेलेल्या श्वासात..!!

हे कोणते चक्र भिरभिरते
मम मस्तकाच्या आसपास..
का आतुर दिसते छाटण्या
उंच झेपावणाऱ्या पंखास..!!

कोण दडवितो काटे बेमालूम
मोहविणाऱ्या मोरपिसात..
का मीच ओढून घेतोय मलाच
अर्था अनर्थाच्या जाळ्यात..!!
**सुनिल पवार..✍🏼
(आगामी कादंबरी "वळणावरच्या वाटा " मधून)