|| एकरूप ||

|| एकरूप ||
=======
धुंद
बरसायचं होतं मला
म्हणून
मी मेघाशी संग केला..
पण
कुठूनसा आला वारा
त्याने
दूर लोटले मला..!!

मंद
वाहायचे होते मला
म्हणून
वाऱ्याशी संग केला..
पण
आडवा आला मलय
अन
मार्ग माझा खुंटला..!!
शिखरावर
पोहचायचे होते मला
म्हणून
मलयाशी संग केला..
पण
धुंद बरसला जलद
त्याने
वाहून नेले मला..!!
आता
न मेघ,न वारा,न मलय
नको
कोणाचा संग मला..
जीवनाचा
हर एक रंग निराळा
त्या जीवनाशी,
एकरूप व्हायचे मला..!!
***सुनिल पवार...✍🏼